ai zamane teri raftar se Dar lagta hai

ai zamāne tirī raftār se Dar lagtā hai

ab tirī dostī se pyaar se Dar lagtā hai

kin havāoñ kā asar tujh pe huā jaatā hai

tere badle hue kirdār se Dar lagtā hai

dekh sakta nahīñ nākām tujhe duniyā meñ

jiit se apnī tirī haar se Dar lagtā hai

dil ko aatā nahīñ iz.hār-e-mohabbat karnā

aur mujh ko tere inkār se Dar lagtā hai

ziist se paa.e haiñ ġham itne ki ab to ham ko

apnī ḳhushiyoñ ke bhī gulzār se Dar lagtā hai

is qadar shor hai in paañv kī zanjīroñ kā

mujh ko paa.el kī bhī jhankār se Dar lagtā hai

nukta-chīnī hai sab ahbāb kā sheva 'sāgar'

is liye apnī hī guftār se Dar lagtā hai

ai zamane teri raftar se Dar lagta hai

ab teri dosti se pyar se Dar lagta hai

kin hawaon ka asar tujh pe hua jata hai

tere badle hue kirdar se Dar lagta hai

dekh sakta nahin nakaam tujhe duniya mein

jit se apni teri haar se Dar lagta hai

dil ko aata nahin izhaar-e-mohabbat karna

aur mujh ko tere inkar se Dar lagta hai

zist se pae hain gham itne ki ab to hum ko

apni KHushiyon ke bhi gulzar se Dar lagta hai

is qadar shor hai in panw ki zanjiron ka

mujh ko pael ki bhi jhankar se Dar lagta hai

nukta-chini hai sab ahbab ka shewa 'sagar'

is liye apni hi guftar se Dar lagta hai