aisa bhi nahin dard ke mare nahin dekhe

aisā bhī nahīñ dard ke maare nahīñ dekhe

ham ne gul-o-bulbul ke ishāre nahīñ dekhe

jab maiñ ne kahā martā huuñ muñh pher ke bole

sunte to haiñ par ishq ke maare nahīñ dekhe

har samt phire ḳhaak uḌāyā kiye barsoñ

par naqsh-e-qadam ham ne tumhāre nahīñ dekhe

poshīda haiñ kis had meñ mirī ḳhaak ke zarre

patthar meñ bhī is tarah ishāre nahīñ dekhe

turbat meñ mire band-e-kafan khol ke bole

ham ne dahan-e-zaḳhm tumhāre nahīñ dekhe

ab qabr pe aa.e ho to is samt bhī dekho

haañ nīchī nigāhoñ ke ishāre nahīñ dekhe

bechain hai dil fasl-e-bahārī meñ 'hasīñ' kā

ab tak kisī gul-rū ke ishāre nahīñ dekhe

aisa bhi nahin dard ke mare nahin dekhe

hum ne gul-o-bulbul ke ishaare nahin dekhe

jab main ne kaha marta hun munh pher ke bole

sunte to hain par ishq ke mare nahin dekhe

har samt phire KHak uDaya kiye barson

par naqsh-e-qadam hum ne tumhaare nahin dekhe

poshida hain kis had mein meri KHak ke zarre

patthar mein bhi is tarah ishaare nahin dekhe

turbat mein mere band-e-kafan khol ke bole

hum ne dahan-e-zaKHm tumhaare nahin dekhe

ab qabr pe aae ho to is samt bhi dekho

han nichi nigahon ke ishaare nahin dekhe

bechain hai dil fasl-e-bahaari mein 'hasin' ka

ab tak kisi gul-ru ke ishaare nahin dekhe