aisa KHumar hai teri chashm-e-ghazal mein

aisā ḳhumār hai tirī chashm-e-ġhazāl meñ

ḳhāliq kā mo'jiza tire husn-o-jamāl meñ

bantā nahīñ javāb ḳhirad kī kahāñ bisāt

kyā kyā tahayyurāt haiñ dil ke savāl meñ

kar de kahīñ na raakh jalā kar zarā sañbhal

hai vo tapish nihāñ mire soz-e-jalāl meñ

ḳhāmoshiyoñ meñ bhī hai judāgāna guftugū

bole to goyā jādūgarī hai kamāl meñ

lutf-o-karam rahe tirā Dhalte raheñ sadā

yā-rab mohabbatoñ ke ye pal māh-o-sāl meñ

mere tasavvurāt se jā.egā vo kahāñ

jis kā qiyām hai mire husn-e-ḳhayāl meñ

is darja ehtiyāt meñ lāzim hai ehtiyāt

TuuTe na dil kā aa.ina is dekh-bhāl meñ

varna shikār karnā hameñ sahl thā kahāñ

marzī se dil kī aa.e haiñ ham tere jaal meñ

huuñ mutma.in maiñ us ko dil-o-jān sauñp kar

us kī razā hai chāhe rakhe jaise haal meñ

rizq-e-halāl se milīñ duniyā kī ne'mateñ

sadqa hai ik javāz ki barkat hai maal meñ

itrā.iye na ḳhud pe ki 'nasrīn' ek din

daur-e-urūj Dhaltā hai daur-e-zavāl meñ

aisa KHumar hai teri chashm-e-ghazal mein

KHaliq ka mo'jiza tere husn-o-jamal mein

banta nahin jawab KHirad ki kahan bisat

kya kya tahayyuraat hain dil ke sawal mein

kar de kahin na rakh jala kar zara sanbhal

hai wo tapish nihan mere soz-e-jalal mein

KHamoshiyon mein bhi hai judagana guftugu

bole to goya jadugari hai kamal mein

lutf-o-karam rahe tera Dhalte rahen sada

ya-rab mohabbaton ke ye pal mah-o-sal mein

mere tasawwuraat se jaega wo kahan

jis ka qiyam hai mere husn-e-KHayal mein

is darja ehtiyat mein lazim hai ehtiyat

TuTe na dil ka aaina is dekh-bhaal mein

warna shikar karna hamein sahl tha kahan

marzi se dil ki aae hain hum tere jal mein

hun mutmain main us ko dil-o-jaan saunp kar

us ki raza hai chahe rakhe jaise haal mein

rizq-e-halal se milin duniya ki ne'maten

sadqa hai ek jawaz ki barkat hai mal mein

itraiye na KHud pe ki 'nasrin' ek din

daur-e-uruj Dhalta hai daur-e-zawal mein