ایسا نہیں کہ آپ سے رشتہ نہیں رہا

ایسا نہیں کہ آپ سے رشتہ نہیں رہا

ہاں پہلے جتنا پیار تھا اتنا نہیں رہا

اتنے فریب کھائے ہیں ہم نے کہ اب ہمیں

دنیا تو دور خود پہ بھروسہ نہیں رہا

ہم کو بھی ان کی کوئی ضرورت نہیں رہی

ان کو بھی انتظار ہمارا نہیں رہا

گلشن کی شان تھا جو شجر اس کی شاخ پر

پھل کی تو بات چھوڑیئے پتا نہیں رہا

تبدیل ہو چکا ہے مرا گاؤں شہر میں

اب خیر خواہ کوئی کسی کا نہیں رہا

تم مل گئے تو مل گئی دنیا ہمیں رتنؔ

اب دیکھنے کو کوئی بھی سپنا نہیں رہا