aise be-mehr zamane se wafa mangta hai

aise be-mehr zamāne se vafā māñgtā hai

dil bhī saada hai ḳhalāoñ meñ havā māñgtā hai

us kā ham ishq-parastoñ se taqābul kaisā

shaiḳh to apnī ibādat kā sila māñgtā hai

jā kisī aur se le nisbat-e-aflāk miyāñ

ham zamīñ-zād faqīroñ se ye kyā māñgtā hai

mohtasib dāman-e-ta.azīr kushāda rakhnā

shahr kā shahr baġhāvat kī sazā māñgtā hai

ḳhauf itnā hai ki bāzāroñ ke siine sākit

qarya qarya kisī bāġhī kī sadā māñgtā hai

laakh samjhā.ūñ mohabbat kī jhalak paate hī

dil vo tarsā huā saa.il hai ki jā māñgtā hai

kuchh na mil paa.e to majbūr tabī.at insāñ

masjid-o-dair-o-kalīsā se duā māñgtā hai

merī āñkheñ tire chehre kī tamāzat chāheñ

merā chehra tire āñchal kī havā māñgtā hai

tujh se jiine ke jo asbāb talab kartā thā

ab vo jī-jān se marne kī duā māñgtā hai

aise be-mehr zamane se wafa mangta hai

dil bhi sada hai KHalaon mein hawa mangta hai

us ka hum ishq-paraston se taqabul kaisa

shaiKH to apni ibaadat ka sila mangta hai

ja kisi aur se le nisbat-e-aflak miyan

hum zamin-zad faqiron se ye kya mangta hai

mohtasib daman-e-tazir kushada rakhna

shahr ka shahr baghawat ki saza mangta hai

KHauf itna hai ki bazaron ke sine sakit

qarya qarya kisi baghi ki sada mangta hai

lakh samjhaun mohabbat ki jhalak pate hi

dil wo tarsa hua sail hai ki ja mangta hai

kuchh na mil pae to majbur tabiat insan

masjid-o-dair-o-kalisa se dua mangta hai

meri aankhen tere chehre ki tamazat chahen

mera chehra tere aanchal ki hawa mangta hai

tujh se jine ke jo asbab talab karta tha

ab wo ji-jaan se marne ki dua mangta hai