aish-e-rafta ne bahut KHun rulaya hai mujhe

aish-e-rafta ne bahut ḳhuun rulāyā hai mujhe

phuul kī sej ne kāñToñ pe sulāyā hai mujhe

de ke ik sho.ala-e-guftār jagāyā hai mujhe

ahd-e-ḳhvābīda ne be-dard banāyā hai mujhe

zard-rū ḳhaar bhī hai āshiq-e-salmā-e-bahār

shoḳh kaliyoñ ne ishāroñ meñ batāyā hai mujhe

TūTtā hī nahīñ rañgīnī-e-ḳhvāhish kā tilism

ism-e-āzam kā amal bhī to sikhāyā hai mujhe

ḳhūn-e-mazlūm akārat to nahīñ jā saktā

zaḳhm-e-gul-rez ne phūloñ se sajāyā hai mujhe

shāyad is daur kā shiv-jī hī samajh kar 'jāved'

vaqt ne ziist kā sab zahr pilāyā hai mujhe

aish-e-rafta ne bahut KHun rulaya hai mujhe

phul ki sej ne kanTon pe sulaya hai mujhe

de ke ek shoala-e-guftar jagaya hai mujhe

ahd-e-KHwabida ne be-dard banaya hai mujhe

zard-ru KHar bhi hai aashiq-e-salma-e-bahaar

shoKH kaliyon ne ishaaron mein bataya hai mujhe

TuTta hi nahin rangini-e-KHwahish ka tilism

ism-e-azam ka amal bhi to sikhaya hai mujhe

KHun-e-mazlum akarat to nahin ja sakta

zaKHm-e-gul-rez ne phulon se sajaya hai mujhe

shayad is daur ka shiw-ji hi samajh kar 'jawed'

waqt ne zist ka sab zahr pilaya hai mujhe