aisi kahan utri hai koi sham meri jaan

aisī kahāñ utrī hai koī shaam mirī jaan

ashjār pe likhā hai tirā naam merī jaan

kaTte haiñ kahāñ ek se din raat ye mausam

hai ziist bhī ik hasrat-e-nākām mirī jaan

khetoñ meñ kahāñ ugte haiñ lafzoñ ke marāsim

harfoñ kī tijārat meñ ga.e naam mirī jaan

mujh ko nahīñ pahuñchī tirī ḳhushbū to karūñ kyā

be-shak tū rahe lāla-o-gulfām mirī jaan

har gaam ta'alluq kī salīboñ pe chaḌhe haiñ

chhuTtā hī nahīñ zaat kā hangām mirī jaan

miT jā.eñge sab ranj-o-alam qurb se tere

bhejā hai tujhe pyaar kā paiġhām mirī jaan

palkoñ pe dhare ḳhvāboñ ke lāshe na uThānā

hai aas yahī 'ishq kā anjām mirī jaan

aisi kahan utri hai koi sham meri jaan

ashjar pe likha hai tera nam meri jaan

kaTte hain kahan ek se din raat ye mausam

hai zist bhi ek hasrat-e-nakaam meri jaan

kheton mein kahan ugte hain lafzon ke marasim

harfon ki tijarat mein gae nam meri jaan

mujh ko nahin pahunchi teri KHushbu to karun kya

be-shak tu rahe lala-o-gulfam meri jaan

har gam ta'alluq ki salibon pe chaDhe hain

chhuTta hi nahin zat ka hangam meri jaan

miT jaenge sab ranj-o-alam qurb se tere

bheja hai tujhe pyar ka paigham meri jaan

palkon pe dhare KHwabon ke lashe na uThana

hai aas yahi 'ishq ka anjam meri jaan