aisi kasak thi aankh se aansu gira na tha

aisī kasak thī aañkh se aañsū girā na thā

is baar merā dard bhī merī davā na thā

bechain ruuh chain se baiThī na ek pal

jab tak mire vo jism meñ dāḳhil huā na thā

ehsān raushnī kā hī rahtā tamām umr

varna tire charāġh se mujh ko gila na thā

is rāste pe manzileñ maiñ ne talāsh kiiñ

jis rāste pe koī kahīñ naqsh-e-pā na thā

maiñ Dar rahā huuñ aaj ki us ke jamāl par

rang-e-hayā to ḳhuub thā rang-e-vafā na thā

dil ne kisī tarah kī parastish na kī qubūl

vo shaḳhs be-misāl thā lekin ḳhudā na thā

us ne bhī ghar banā.e the kitnoñ ke zehn meñ

'sājid' use tū sochne vaalā nayā na thā

aisi kasak thi aankh se aansu gira na tha

is bar mera dard bhi meri dawa na tha

bechain ruh chain se baiThi na ek pal

jab tak mere wo jism mein daKHil hua na tha

ehsan raushni ka hi rahta tamam umr

warna tere charagh se mujh ko gila na tha

is raste pe manzilen main ne talash kin

jis raste pe koi kahin naqsh-e-pa na tha

main Dar raha hun aaj ki us ke jamal par

rang-e-haya to KHub tha rang-e-wafa na tha

dil ne kisi tarah ki parastish na ki qubul

wo shaKHs be-misal tha lekin KHuda na tha

us ne bhi ghar banae the kitnon ke zehn mein

'sajid' use tu sochne wala naya na tha