aisi tashbih faqat husn ki badnami hai

aisī tashbīh faqat husn kī badnāmī hai

maah aariz ko likhā ḳhāme kī ye ḳhāmī hai

rañg ye un kī sabāhat ne ajab dikhlāyā

surḳh joḌe pe gumāñ hotā hai bādāmī hai

kahte phirte ho burā mujh ko ye baat achchhī nahīñ

merī rusvā.ī meñ sāhab kī bhī badnāmī hai

aap kī bātoñ se dil pak gayā jab kahtā huuñ maiñ

hañs ke kahte haiñ ye ulfat kī faqat ḳhāmī hai

chūmtā hai koī āñkhoñ se lagātā hai koī

hai libās aap kā yā jāma-e-ehrāmī hai

nahīñ Dagne kā qadam rāh-e-vafā se apnā

jo sitam chāho karo sabr mirā haamī hai

aap kī ishq kī iizā meñ hai lutf o rāhat

aap par ḳhatm mirī jaan dil-ārāmī hai

ham akele nahīñ rahte shab-e-tanhā.ī meñ

yās-o-andoh-o-ġham o hasrat-o-nākāmī hai

dil ko abrū haiñ pasand aañkh ko chashm-e-mai-gūñ

koī duniyā meñ hilālī hai koī jaamī hai

lauh-e-qur.āñ jo kahā un kī jabīñ ko 'zebā'

is meñ kuchh shak nahīñ tashbīh ye ilhāmī hai

aisi tashbih faqat husn ki badnami hai

mah aariz ko likha KHame ki ye KHami hai

rang ye un ki sabahat ne ajab dikhlaya

surKH joDe pe guman hota hai baadami hai

kahte phirte ho bura mujh ko ye baat achchhi nahin

meri ruswai mein sahab ki bhi badnami hai

aap ki baaton se dil pak gaya jab kahta hun main

hans ke kahte hain ye ulfat ki faqat KHami hai

chumta hai koi aankhon se lagata hai koi

hai libas aap ka ya jama-e-ehrami hai

nahin Dagne ka qadam rah-e-wafa se apna

jo sitam chaho karo sabr mera hami hai

aap ki ishq ki iza mein hai lutf o rahat

aap par KHatm meri jaan dil-arami hai

hum akele nahin rahte shab-e-tanhai mein

yas-o-andoh-o-gham o hasrat-o-nakaami hai

dil ko abru hain pasand aankh ko chashm-e-mai-gun

koi duniya mein hilali hai koi jami hai

lauh-e-quran jo kaha un ki jabin ko 'zeba'

is mein kuchh shak nahin tashbih ye ilhami hai