ajib Dhab ka musafir hai ghar na aaega

'ajīb Dhab kā musāfir hai ghar na aa.egā

jo vaqt biit gayā lauT kar na aa.egā

ye eqtidār milā hai baḌe jatan kar ke

ab un ko apne sivā kuchh nazar na aa.egā

charāġh kaise jaleñge udaas palkoñ par

jo Dhal ke ashkoñ meñ ḳhūn-e-jigar na aa.egā

ye gumrahī bhī na.e rāste nikālegī

hamāre aage agar rāhbar na aa.egā

na jaane kyoñ mirī āñkheñ lagī rahīñ dar par

maiñ jāntā thā ki vo raat bhar na aa.egā

ye sāniha hai ki sar se uThe ghane saa.e

ab apnī raah meñ koī shajar na aa.egā

ġhamoñ ke peḌ ke nīche khaḌe hue ho 'anīs'

tumhāre haath ḳhushī kā samar na aa.egā

'ajib Dhab ka musafir hai ghar na aaega

jo waqt bit gaya lauT kar na aaega

ye eqtidar mila hai baDe jatan kar ke

ab un ko apne siwa kuchh nazar na aaega

charagh kaise jalenge udas palkon par

jo Dhal ke ashkon mein KHun-e-jigar na aaega

ye gumrahi bhi nae raste nikalegi

hamare aage agar rahbar na aaega

na jaane kyon meri aankhen lagi rahin dar par

main jaanta tha ki wo raat bhar na aaega

ye saniha hai ki sar se uThe ghane sae

ab apni rah mein koi shajar na aaega

ghamon ke peD ke niche khaDe hue ho 'anis'

tumhaare hath KHushi ka samar na aaega