ajib KHamushi hai ghul machati rahti hai

ajiib ḳhāmushī hai ġhul machātī rahtī hai

ye āsmān hī sar par uThātī rahtī hai

kiyā hai ishq to sābit-qadam bhī rahnā siikh

miyāñ ye hijr kī aafat to aatī rahtī hai

ye jo hai aaj ḳharāba kabhī chaman thā kyā

yahāñ to ek magas bhinbhinātī rahtī hai

Daro nahīñ ye koī saañp zer-e-kāh nahīñ

havā hai aur vahī sarsarātī rahtī hai

mire hī vāste manzar zuhūr karte haiñ

mirī hī aañkh yahāñ jagmagātī rahtī hai

havā agarche bahut tez hai magar phir bhī

maiñ ḳhaak huuñ ye mire kaam aatī rahtī hai

ye kaisī chashm-e-taḳhayyul hai ūñghtī bhī nahīñ

ajiib rañg ke manzar banātī rahtī hai

vo ik nigāh bhī neze se kam nahīñ ya.anī

hamāre ḳhūn-e-jigar meñ nahātī rahtī hai

qadam bhī ḳhaak pe karte haiñ kuchh na kuchh tahrīr

havā kī mauj bhī us ko miTātī rahtī hai

ajib KHamushi hai ghul machati rahti hai

ye aasman hi sar par uThati rahti hai

kiya hai ishq to sabit-qadam bhi rahna sikh

miyan ye hijr ki aafat to aati rahti hai

ye jo hai aaj KHaraba kabhi chaman tha kya

yahan to ek magas bhinbhinati rahti hai

Daro nahin ye koi sanp zer-e-kah nahin

hawa hai aur wahi sarsaraati rahti hai

mere hi waste manzar zuhur karte hain

meri hi aankh yahan jagmagati rahti hai

hawa agarche bahut tez hai magar phir bhi

main KHak hun ye mere kaam aati rahti hai

ye kaisi chashm-e-taKHayyul hai unghti bhi nahin

ajib rang ke manzar banati rahti hai

wo ek nigah bhi neze se kam nahin yani

hamare KHun-e-jigar mein nahati rahti hai

qadam bhi KHak pe karte hain kuchh na kuchh tahrir

hawa ki mauj bhi us ko miTati rahti hai