عجیب شخص تھا ڈر ڈر کے گھات کرتا تھا

عجیب شخص تھا ڈر ڈر کے گھات کرتا تھا

دیے جلاتا تھا تب جا کے رات کرتا تھا

اسی کی طرح تھا خونخوار جذبۂ عشق اس کا

نظر نظر میں نئے واردات کرتا تھا

بچھڑ کے اس سے اب آتا ہے یاد اکثر کیوں

وہ جب بھی ملتا بچھڑنے کی بات کرتا تھا

کسے یقین ہو شمشیر دیکھ کر اس کی

وہ اک زمانے میں پھولوں کی بات کرتا تھا

مچل سے اٹھتے تھے سارے درخت جنگل کے

پرندہ اڑتے ہوے معجزات کرتا تھا

وہ مسکراتا تو پلکوں پہ دن چمکتے تھے

اداس ہوتا تو آنکھوں میں رات کرتا تھا

وہ سنگ دل تھا کہ جیسے بھی سب سے پیش آتا

وہی سلوک وہ اپنے بھی ساتھ کرتا تھا