ajnabi jaana kisi ne dushman-e-jaani mujhe

ajnabī jaanā kisī ne dushman-e-jānī mujhe

jaan kar bhī aaj tak duniyā na pahchānī mujhe

yaad jab aaya hai daur-e-hashr-sāmānī mujhe

paanī paanī kar gayā andāz-e-insānī mujhe

dūsroñ kī rāhatoñ kā rāsta to khul gayā

raas aa.e yā na aa.e merī qurbānī mujhe

le uḌā vo to mujhe merā par-e-parvāz-e-shauq

maar detī gulsitāñ kī tang-dāmānī mujhe

maiñ to samjhā thā miTā Dāleñge ye mirā vujūd

hādsoñ ne baḳhsh dī ik 'umr-e-lāfānī mujhe

paañv uThte hī ga.e manzil kī jānib dam-ba-dam

raah dikhlātī ga.ī merī pareshānī mujhe

manzil-e-maqsūd raushan rāsta be-pech-o-ḳham

ab safar kī chāhiye kyā aur āsānī mujhe

chhoḌ kar is āstāñ ko ye milī mujh ko sazā

dar-ba-dar karnī paḌī ḳham apnī peshānī mujhe

jaan de dete haiñ nāhaq par bhī log apnī 'azīz'

haq-bayānī se ho kyoñ āḳhir pashemānī mujhe

ajnabi jaana kisi ne dushman-e-jaani mujhe

jaan kar bhi aaj tak duniya na pahchani mujhe

yaad jab aaya hai daur-e-hashr-samani mujhe

pani pani kar gaya andaz-e-insani mujhe

dusron ki rahaton ka rasta to khul gaya

ras aae ya na aae meri qurbani mujhe

le uDa wo to mujhe mera par-e-parwaz-e-shauq

mar deti gulsitan ki tang-damani mujhe

main to samjha tha miTa Dalenge ye mera wujud

hadson ne baKHsh di ek 'umr-e-lafani mujhe

panw uThte hi gae manzil ki jaanib dam-ba-dam

rah dikhlati gai meri pareshani mujhe

manzil-e-maqsud raushan rasta be-pech-o-KHam

ab safar ki chahiye kya aur aasani mujhe

chhoD kar is aastan ko ye mili mujh ko saza

dar-ba-dar karni paDi KHam apni peshani mujhe

jaan de dete hain nahaq par bhi log apni 'aziz'

haq-bayani se ho kyon aaKHir pashemani mujhe