اجنبی ٹھہرا الگ ٹھہرا ہوں تنہا ٹھہرا

اجنبی ٹھہرا الگ ٹھہرا ہوں تنہا ٹھہرا

میں زباں رکھ کے بھی اس شہر میں گونگا ٹھہرا

آپ کی بزم میں جانا نہ کسی نے مجھ کو

یوں تو کہنے کو ہر اک فرد شناسا ٹھہرا

کس کو معلوم کہ کب پھونک دے یہ دامن دل

اشک ہے یا کوئی پلکوں پہ ہے شعلہ ٹھہرا

مجھ سے ملتے ہی نہیں حسن کی دولت والے

میں حسینوں کی نگاہوں میں لٹیرا ٹھہرا

اب کے سیلاب میں ہر گاؤں ہوا ہے غرقاب

میرا محفوظ یہ کاغذ کا گھروندا ٹھہرا

جسم کا میرے بدلتا ہوا موسم افسرؔ

جیسے میں شاخ کا ٹوٹا ہوا پتہ ٹھہرا