alam ki baat se aazar-e-jaan se kuchh nahin hota

alam kī baat se āzār-e-jāñ se kuchh nahīñ hotā

vo aalam hai ki ehsās-e-ziyāñ se kuchh nahīñ hotā

vaqār-e-gulsitāñ kī pāsdārī baat hai varna

chaman ke naam par husn-e-bayāñ se kuchh nahīñ hotā

amal kī quvvat-e-tasḳhīr se duniyā badaltī hai

shikāyat-hā-e-jaur-e-āsmāñ se kuchh nahīñ hotā

yaqīñ mohkam agar ho gardish-e-daurāñ badal Daale

gumāñ kitnā hī baḌh jaa.e gumāñ se kuchh nahīñ hotā

nazar sayyād ke hālāt par rakhnā zarūrī hai

faqat taz.īn-e-shāḳh-e-āshiyāñ se kuchh nahīñ hotā

jahāñ hālāt par tanqīd hī karnā zarūrī ho

vahāñ ra.anā.ī-e-husn-e-bayāñ se kuchh nahīñ hotā

jahāñ dār-o-rasan kī baat mauzū-e-suḳhan Thahre

vahāñ ulfat kī rangīñ dāstāñ se kuchh nahīñ hotā

vahāñ aksar kalām-e-narm-o-shīrīñ ḳhuub hotā hai

ki aksar jis jagah teġh-o-sināñ se kuchh nahīñ hotā

ba-nām-e-ishq jazb-e-jāñ-faroshī kī zarūrat hai

musalsal sajda-hā-e-āstāñ se kuchh nahīñ hotā

mohabbat meñ ik aisā vaqt bhī aatā hai insāñ par

ki jab taskīn-e-dil ārām-e-jāñ se kuchh nahīñ hotā

kisī bhī taur ab taskīn kī sūrat nahīñ bantī

kisī bhī mehrbāñ nā-mehrbāñ se kuchh nahīñ hotā

nasheman phūñk hī Daalā 'qamar' jab apne hāthoñ se

ab aatī hai to ab barq-e-tapāñ se kuchh nahīñ hotā

alam ki baat se aazar-e-jaan se kuchh nahin hota

wo aalam hai ki ehsas-e-ziyan se kuchh nahin hota

waqar-e-gulsitan ki pasdari baat hai warna

chaman ke nam par husn-e-bayan se kuchh nahin hota

amal ki quwwat-e-tasKHir se duniya badalti hai

shikayat-ha-e-jaur-e-asman se kuchh nahin hota

yaqin mohkam agar ho gardish-e-dauran badal Dale

guman kitna hi baDh jae guman se kuchh nahin hota

nazar sayyaad ke haalat par rakhna zaruri hai

faqat tazin-e-shaKH-e-ashiyan se kuchh nahin hota

jahan haalat par tanqid hi karna zaruri ho

wahan ranai-e-husn-e-bayan se kuchh nahin hota

jahan dar-o-rasan ki baat mauzu-e-suKHan Thahre

wahan ulfat ki rangin dastan se kuchh nahin hota

wahan aksar kalam-e-narm-o-shirin KHub hota hai

ki aksar jis jagah tegh-o-sinan se kuchh nahin hota

ba-nam-e-ishq jazb-e-jaan-faroshi ki zarurat hai

musalsal sajda-ha-e-astan se kuchh nahin hota

mohabbat mein ek aisa waqt bhi aata hai insan par

ki jab taskin-e-dil aaram-e-jaan se kuchh nahin hota

kisi bhi taur ab taskin ki surat nahin banti

kisi bhi mehrban na-mehrban se kuchh nahin hota

nasheman phunk hi Dala 'qamar' jab apne hathon se

ab aati hai to ab barq-e-tapan se kuchh nahin hota