الم کی بات سے آزار جاں سے کچھ نہیں ہوتا

الم کی بات سے آزار جاں سے کچھ نہیں ہوتا

وہ عالم ہے کہ احساس زیاں سے کچھ نہیں ہوتا

وقار گلستاں کی پاسداری بات ہے ورنہ

چمن کے نام پر حسن بیاں سے کچھ نہیں ہوتا

عمل کی قوت تسخیر سے دنیا بدلتی ہے

شکایت ہائے جور آسماں سے کچھ نہیں ہوتا

یقیں محکم اگر ہو گردش دوراں بدل ڈالے

گماں کتنا ہی بڑھ جائے گماں سے کچھ نہیں ہوتا

نظر صیاد کے حالات پر رکھنا ضروری ہے

فقط تزئین شاخ آشیاں سے کچھ نہیں ہوتا

جہاں حالات پر تنقید ہی کرنا ضروری ہو

وہاں رعنائی حسن بیاں سے کچھ نہیں ہوتا

جہاں دار و رسن کی بات موضوع سخن ٹھہرے

وہاں الفت کی رنگیں داستاں سے کچھ نہیں ہوتا

وہاں اکثر کلام نرم و شیریں خوب ہوتا ہے

کہ اکثر جس جگہ تیغ و سناں سے کچھ نہیں ہوتا

بہ نام عشق جذب جاں فروشی کی ضرورت ہے

مسلسل سجدہ ہائے آستاں سے کچھ نہیں ہوتا

محبت میں اک ایسا وقت بھی آتا ہے انساں پر

کہ جب تسکین دل آرام جاں سے کچھ نہیں ہوتا

کسی بھی طور اب تسکین کی صورت نہیں بنتی

کسی بھی مہرباں نا مہرباں سے کچھ نہیں ہوتا

نشیمن پھونک ہی ڈالا قمرؔ جب اپنے ہاتھوں سے

اب آتی ہے تو اب برق تپاں سے کچھ نہیں ہوتا