الم نصیب سہی کچھ تو مسکرا بھی سکو

الم نصیب سہی کچھ تو مسکرا بھی سکو

سحر کے نام پہ دیوار شب گرا بھی سکو

گئی رتوں کے گلابوں سی ہے مہک اس میں

پھر اس کو یاد کرو دل کو گدگدا بھی سکو

وہ اتنا زود فراموش ہے تو کیا ہوگا

ہزار عہد اگر یاد اسے دلا بھی سکو

یہ کیا لگاؤ کہ ہم راستے کا پتھر ہیں

یہ کیا گریز کہ تم پھر پلٹ کے آ بھی سکو

وہ دل فریب سہی کاش دل زدو تم بھی

جو کب کا بھول چکا ہے اسے بھلا بھی سکو

قبائے شب میں سلگتے ہیں زخم دن بھر کے

لہو کی آگ سے کچھ روشنی بڑھا بھی سکو

یہ مانا اک وہی قاتل ہے شہر میں سرمدؔ

کم از کم اس کی نظر سے نظر ملا بھی سکو