allah bashar jah-o-hasham bech rahe hain

allāh bashar jāh-o-hasham bech rahe haiñ

ḳhud-sāḳhta patthar ke sanam bech rahe haiñ

maġhrib kī ta.affun-zada tahzīb ke badle

ham arz-e-muqaddas kā haram bech rahe haiñ

bebāk sadāqat se jo mansūb rahā hai

dil rotā hai kyoñ log qalam bech rahe haiñ

hairān huuñ maiñ saḳhtī-e-jāñ dekh ke un kī

kis dil se vo rūdād-e-sitam bech rahe haiñ

pesha hai kisī kā to koī bhuuk se majbūr

bāzār-e-adālat meñ qasam bech rahe haiñ

hijrat huī az.hān pe kuchh aise musallat

vo ghar thā jo ik bāġh-e-iram bech rahe haiñ

'as.ad' yahāñ maz.hab hai munāfa kī tijārat

har moḌ pe ab log dharam bech rahe haiñ

allah bashar jah-o-hasham bech rahe hain

KHud-saKHta patthar ke sanam bech rahe hain

maghrib ki taffun-zada tahzib ke badle

hum arz-e-muqaddas ka haram bech rahe hain

bebak sadaqat se jo mansub raha hai

dil rota hai kyon log qalam bech rahe hain

hairan hun main saKHti-e-jaan dekh ke un ki

kis dil se wo rudad-e-sitam bech rahe hain

pesha hai kisi ka to koi bhuk se majbur

bazar-e-adalat mein qasam bech rahe hain

hijrat hui azhan pe kuchh aise musallat

wo ghar tha jo ek bagh-e-iram bech rahe hain

'asad' yahan mazhab hai munafa ki tijarat

har moD pe ab log dharam bech rahe hain