andhere dur kare nur se ujale mujhe

añdhere duur kare nuur se ujāle mujhe

koī to ho jo tire ba.ad bhī sambhāle mujhe

maiñ mar rahā huuñ magar saañs de rahe haiñ baham

tumhārī zaat se mansūb kuchh havāle mujhe

ye rūd-e-ḳhvāb nahīñ maḳhmase kā dariyā hai

Dubo.e ishq kabhī josh meñ uchhāle mujhe

abhī maiñ rail kī paTrī se duur baiThā huuñ

abhī hai vaqt agar ho sake manā le mujhe

nahīñ hai yaad mujhe naam haañ magar āñkheñ

sharāb bhuul chukā yaad haiñ pyāle mujhe

maiñ sauñp duuñ use in.aam meñ bachī sāñseñ

mire vajūd ke malbe se jo nikāle mujhe

nishān mel kī rañgīniyoñ ke sadqe hue

bahut aziiz haiñ paañv ke saare chhāle mujhe

andhere dur kare nur se ujale mujhe

koi to ho jo tere baad bhi sambhaale mujhe

main mar raha hun magar sans de rahe hain baham

tumhaari zat se mansub kuchh hawale mujhe

ye rud-e-KHwab nahin maKHmase ka dariya hai

Duboe ishq kabhi josh mein uchhaale mujhe

abhi main rail ki paTri se dur baiTha hun

abhi hai waqt agar ho sake mana le mujhe

nahin hai yaad mujhe nam han magar aankhen

sharab bhul chuka yaad hain pyale mujhe

main saunp dun use inam mein bachi sansen

mere wajud ke malbe se jo nikale mujhe

nishan mel ki ranginiyon ke sadqe hue

bahut aziz hain panw ke sare chhaale mujhe