اندھیری شب ہو مسلط گھٹائیں جیسی ہوں

اندھیری شب ہو مسلط گھٹائیں جیسی ہوں

کہ ہم چراغ بکف ہیں ہوائیں جیسی ہوں

نہ میرے کام ہی آئی یہ آبلہ پائی

نہ دیکھتے ہیں وہ مڑ کر صدائیں جیسی ہوں

میں دل زدہ ہوں کہ وہ شوخ ہی کچھ ایسا ہے

اسی کے نام لکھی ہیں ادائیں جیسی ہوں

یہ نارسائی کے شکوے ارے معاذ اللہ

تمہارے در پہ تو آئے وفائیں جیسی ہوں

خود آگہی کی ابھی تک صلیب اٹھائے ہوئے

پھرے ہیں کوچہ بہ کوچہ سزائیں جیسی ہوں

نیاز شرط ہے دل کے گداز کو سرمدؔ

تم اپنا ہاتھ اٹھاؤ دعائیں جیسی ہوں