apne andar ka kuchh ubaal nikal

apne andar kā kuchh ubaal nikāl

ai suḳhanvar nayā ḳhayāl nikāl

log malbe tale dabe hue haiñ

chhoḌ kāġhaz qalam kudāl nikāl

tū bahut vaqt le chukā hai mirā

ab mire roz-o-māh-o-sāl nikāl

yā mirī baat kā javāb banā

yā mire zehn se savāl nikāl

dekhtā huuñ maiñ terī shīshagarī

chal zarā aa.ine se baal nikāl

joḌ ā.inda ko guzishta se

aur is meñ se merā haal nikāl

is ko chūn-o-charā pasand nahīñ hai

apnī bātoñ se qīl-o-qāl nikāl

maiñ tire sāmne paḌā huā huuñ

aa.ine mere ḳhadd-o-ḳhāl nikāl

tū to kahtā thā saiñkaḌoñ haiñ 'azīz'

chal koī ek hī nikāl nikāl

apne andar ka kuchh ubaal nikal

ai suKHanwar naya KHayal nikal

log malbe tale dabe hue hain

chhoD kaghaz qalam kudal nikal

tu bahut waqt le chuka hai mera

ab mere roz-o-mah-o-sal nikal

ya meri baat ka jawab bana

ya mere zehn se sawal nikal

dekhta hun main teri shishagari

chal zara aaine se baal nikal

joD aainda ko guzishta se

aur is mein se mera haal nikal

is ko chun-o-chara pasand nahin hai

apni baaton se qil-o-qal nikal

main tere samne paDa hua hun

aaine mere KHadd-o-KHal nikal

tu to kahta tha sainkaDon hain 'aziz'

chal koi ek hi nikal nikal