apne be-nur charaghon ko ziya di jae

apne be-nūr charāġhoñ ko ziyā dī jaa.e

na ki hamsā.e kī qindīl bujhā dī jaa.e

sub.h-e-kāzib hai koī mil ke sadā dī jaa.e

ye siyah dhuup kī dīvār girā dī jaa.e

naġhma-o-nai se ubhāreñ koī tasvīr-e-junūñ

jis meñ sho'loñ kī lapak ho vo sadā dī jaa.e

rāz-e-ġham majlis-e-ahbāb kī tafrīh nahīñ

ā.ina-ḳhāne meñ kyoñ sham' jalā dī jaa.e

rāste qāfile vāloñ kī nazar meñ haiñ tamām

dhuul se laakh bagūloñ ko havā dī jaa.e

shukriya tū mirī fitrat hai magar saa.e to hoñ

dasht se dhuup kī jājim to uThā dī jaa.e

jis kā muddat se hai shīshe ke makānoñ meñ rivāj

ham pe us 'ishq kī tohmat na lagā dī jaa.e

yuuñ bhī hotā hai kahīñ jaur-e-bahārāñ kā 'ilāj

phuul kī shakl bhī kāñTe se milā dī jaa.e

jin ke ash'ār se ho garm javānoñ kā lahū

kyoñ musalsal unheñ fāqoñ kī sazā dī jaa.e

dār-o-zindāñ kā to ik shor bapā hai lekin

koī jiine kī to tadbīr batā dī jaa.e

har ufuq se mirī āvāz palaT aatī hai

kis darīche se unheñ jā ke sadā dī jaa.e

ek afsāna hai hāthoñ se garebānoñ tak

baat bahroñ ko sunā kar na gañvā dī jaa.e

ik musavvir ne jo sauñpī thī amānat kī tarah

baa'z kahte haiñ vo tasvīr miTā dī jaa.e

jin ko be-vaqt murā'āt ne baḳhshā hai junūñ

un pe kuchh qaid-e-sharāfat bhī lagā dī jaa.e

inqilābāt haiñ ḳhud apne usūloñ kā javāz

ab ke aa.iin meñ ye shiq bhī baḌhā dī jaa.e

jis kī tahzīb musalmāñ se sañbhālī na ga.ī

phir usī kū-e-tajallī meñ sadā dī jaa.e

qabr ke chaukhTe ḳhālī haiñ unheñ mat bhūlo

jaane kab kaun sī tasvīr lagā dī jaa.e

farz hai us pe mohammad kī ġhulāmī 'dānish'

jis kī tahvīl meñ maḳhlūq-e-ḳhudā dī jaa.e

apne be-nur charaghon ko ziya di jae

na ki hamsae ki qindil bujha di jae

subh-e-kazib hai koi mil ke sada di jae

ye siyah dhup ki diwar gira di jae

naghma-o-nai se ubhaaren koi taswir-e-junun

jis mein sho'lon ki lapak ho wo sada di jae

raaz-e-gham majlis-e-ahbab ki tafrih nahin

aaina-KHane mein kyon sham' jala di jae

raste qafile walon ki nazar mein hain tamam

dhul se lakh bagulon ko hawa di jae

shukriya tu meri fitrat hai magar sae to hon

dasht se dhup ki jajim to uTha di jae

jis ka muddat se hai shishe ke makanon mein riwaj

hum pe us 'ishq ki tohmat na laga di jae

yun bhi hota hai kahin jaur-e-bahaaran ka 'ilaj

phul ki shakl bhi kanTe se mila di jae

jin ke ash'ar se ho garm jawanon ka lahu

kyon musalsal unhen faqon ki saza di jae

dar-o-zindan ka to ek shor bapa hai lekin

koi jine ki to tadbir bata di jae

har ufuq se meri aawaz palaT aati hai

kis dariche se unhen ja ke sada di jae

ek afsana hai hathon se garebanon tak

baat bahron ko suna kar na ganwa di jae

ek musawwir ne jo saunpi thi amanat ki tarah

ba'z kahte hain wo taswir miTa di jae

jin ko be-waqt mura'at ne baKHsha hai junun

un pe kuchh qaid-e-sharafat bhi laga di jae

inqilabaat hain KHud apne usulon ka jawaz

ab ke aain mein ye shiq bhi baDha di jae

jis ki tahzib musalman se sanbhaali na gai

phir usi ku-e-tajalli mein sada di jae

qabr ke chaukhTe KHali hain unhen mat bhulo

jaane kab kaun si taswir laga di jae

farz hai us pe mohammad ki ghulami 'danish'

jis ki tahwil mein maKHluq-e-KHuda di jae