apne dil ka haal na kahna kaisa lagta hai

apne dil kā haal na kahnā kaisā lagtā hai

tum ko apnā chup chup rahnā kaisā lagtā hai

dukh kī būñdeñ kyā tum ko bhī khātī rahtī haiñ

āhista āhista Dhahnā kaisā lagtā hai

dard bharī rāteñ jis dam halkore detī haiñ

dariyāoñ ke ruḳh par bahnā kaisā lagtā hai

maiñ to apnī dhun meñ chakrāyā sā phirtā huuñ

tum ko apnī mauj meñ rahnā kaisā lagtā hai

kyā tum bhī sāhil kī sūrat kaTte rahte ho

pal pal ġham kī lahreñ sahnā kaisā lagtā hai

kyā shāmeñ tum ko bhī shab bhar be-kal rakhtī haiñ

tum sūraj ho tum ko lahnā kaisā lagtā hai

kyā tum bhī galiyoñ meñ ghar kī vus.at paate ho

tum ko ghar se bāhar rahnā kaisā lagtā hai

kam-āhañg suroñ meñ tum kyā gaate rahte ho

kuchh bhī na sunñā kuchh bhī na kahnā kaisā lagtā hai

dard to sāñsoñ meñ baste haiñ kaun dikhā.e tumheñ

phūloñ par ḳhushbū kā gahna kaisā lagtā hai

apne dil ka haal na kahna kaisa lagta hai

tum ko apna chup chup rahna kaisa lagta hai

dukh ki bunden kya tum ko bhi khati rahti hain

aahista aahista Dhahna kaisa lagta hai

dard bhari raaten jis dam halkore deti hain

dariyaon ke ruKH par bahna kaisa lagta hai

main to apni dhun mein chakraya sa phirta hun

tum ko apni mauj mein rahna kaisa lagta hai

kya tum bhi sahil ki surat kaTte rahte ho

pal pal gham ki lahren sahna kaisa lagta hai

kya shamen tum ko bhi shab bhar be-kal rakhti hain

tum suraj ho tum ko lahna kaisa lagta hai

kya tum bhi galiyon mein ghar ki wusat pate ho

tum ko ghar se bahar rahna kaisa lagta hai

kam-ahang suron mein tum kya gate rahte ho

kuchh bhi na sunna kuchh bhi na kahna kaisa lagta hai

dard to sanson mein baste hain kaun dikhae tumhein

phulon par KHushbu ka gahna kaisa lagta hai