apne ehsas-e-sharar-bar se Dar lagta hai

apne ehsās-e-sharar-bār se Dar lagtā hai

apnī hī jur.at-e-iz.hār se Dar lagtā hai

itnī rāhoñ kī sa.ūbat se guzar jaane ke ba.ad

ab kise vādī-e-pur-ḳhār se Dar lagtā hai

kitne hī kaam adhūre haiñ abhī duniyā meñ

umr kī tezī-e-raftār se Dar lagtā hai

saarī duniyā meñ tabāhī ke sivā kyā hogā

ab to har sub.h ke aḳhbār se Dar lagtā hai

ḳhud ko manvā.ūñ zamāne se to TukḌe ho jā.ūñ

kuchh rivāyāt kī dīvār se Dar lagtā hai

shauq-e-shorīda ke hāthoñ hue badnām bahut

ab to har jazba-e-bedār se Dar lagtā hai

jāntī huuñ ki chhupe rahte haiñ fitne is meñ

aap kī narmī-e-guftār se Dar lagtā hai

apne ehsas-e-sharar-bar se Dar lagta hai

apni hi jurat-e-izhaar se Dar lagta hai

itni rahon ki saubat se guzar jaane ke baad

ab kise wadi-e-pur-KHar se Dar lagta hai

kitne hi kaam adhure hain abhi duniya mein

umr ki tezi-e-raftar se Dar lagta hai

sari duniya mein tabahi ke siwa kya hoga

ab to har subh ke aKHbar se Dar lagta hai

KHud ko manwaun zamane se to TukDe ho jaun

kuchh riwayat ki diwar se Dar lagta hai

shauq-e-shorida ke hathon hue badnam bahut

ab to har jazba-e-bedar se Dar lagta hai

jaanti hun ki chhupe rahte hain fitne is mein

aap ki narmi-e-guftar se Dar lagta hai