اپنے حالات میں بدلاؤ نہیں چاہتا میں

اپنے حالات میں بدلاؤ نہیں چاہتا میں

اب کسی سے کوئی ٹکراؤ نہیں چاہتا میں

دیر تک رکھتی ہے بے سدھ مجھے سوندھی خوشبو

دل تری مٹی پے چھڑکاؤ نہیں چاہتا میں

پہلی بارش میں ہی ہو جائے بدن سبز مرا

رفتہ رفتہ کوئی بدلاؤ نہیں چاہتا میں

گھر کے ہر کمرے کو سامان سے بھر ڈالا ہے

اپنی آواز کا دہراؤ نہیں چاہتا میں

اس قدر کیوں ہے بھروسہ مجھے ان لہروں پر

کیوں کوئی تنکا کوئی ناؤ نہیں چاہتا میں

خود وہ زخموں کو سلے یا مجھے مر جانے دے

اور اس شرط میں بدلاؤ نہیں چاہتا میں