اپنی آواز کو پگھلا ہوا شیشہ مت کر

اپنی آواز کو پگھلا ہوا شیشہ مت کر

حکم کر حکم یوں رو رو کے تقاضہ مت کر

اچھے اچھوں کی برے لوگوں سے نسبت ہے یہاں

خود کو حیران کیے جا مگر اتنا مت کر

یہ جو دنیا ہے بنا ڈال اسی کو مذہب

دین کوئی بھی ترا ہو اسے دنیا مت کر

حد میں رہنے کے بھی ہوتے ہیں فوائد اپنے

اوب جائے کوئی اتنا بھی تماشہ مت کر

اب اٹھا رکھ تو یہ احساس ندامت کا بوجھ

میں نے پہلے ہی کہا تھا کوئی وعدہ مت کر

مجھ کو تنہا تو بڑے شوق سے کر دے ترکشؔ

میرے چکر میں مگر خود کو اکیلا مت کر