apni KHata ko isne mere nam likh diya

apnī ḳhatā ko is ne mire naam likh diyā

us par kamāl ye ki sar-e-ām likh diyā

andhoñ ke darmiyān rahūñ aa.ina misāl

mere liye ḳhudā ne ajab kaam likh diyā

nārāz hai vo mujh se bas itnī sī baat par

tīra-shabī ko din na likhā shaam likh diyā

kuchh ban paḌā na hasrat-e-tāmīr se to phir

ujḌe hue khañDar ko dar-o-bām likh diyā

jab tīrgī baḌhegī to chamkegā aur bhī

dil ke lahū se ham ne tirā naam likh diyā

kahte haiñ kis ko sabr-o-tahammul ye ham se pūchh

taklīf jo milī use ārām likh diyā

ye bhī huā ki jis ne ujāḌe the ghar ke ghar

munsif ne us ko lā.eq-e-in.ām likh diyā

chāhī thī maiñ ne jis kī bhalā.ī tamām umr

us ne mirī duāoñ ko dushnām likh diyā

koī to baat hogī ki ahl-e-nigāh ne

jitne samar the puḳhta unheñ ḳhaam likh diyā

ab vāsta paḌā hai to 'māhir' khulā ye raaz

patthar badan ko ham ne gul-andām likh diyā

apni KHata ko is ne mere nam likh diya

us par kamal ye ki sar-e-am likh diya

andhon ke darmiyan rahun aaina misal

mere liye KHuda ne ajab kaam likh diya

naraaz hai wo mujh se bas itni si baat par

tira-shabi ko din na likha sham likh diya

kuchh ban paDa na hasrat-e-tamir se to phir

ujDe hue khanDar ko dar-o-baam likh diya

jab tirgi baDhegi to chamkega aur bhi

dil ke lahu se hum ne tera nam likh diya

kahte hain kis ko sabr-o-tahammul ye hum se puchh

taklif jo mili use aaram likh diya

ye bhi hua ki jis ne ujaDe the ghar ke ghar

munsif ne us ko laeq-e-inam likh diya

chahi thi main ne jis ki bhalai tamam umr

us ne meri duaon ko dushnam likh diya

koi to baat hogi ki ahl-e-nigah ne

jitne samar the puKHta unhen KHam likh diya

ab wasta paDa hai to 'mahir' khula ye raaz

patthar badan ko hum ne gul-andam likh diya