apni nai zamin naya aasman rahe

apnī na.ī zamīn nayā āsmāñ rahe

haañ is jahāñ se duur hī apnā jahāñ rahe

ham ne to is chaman se lagāyā kabhī na dil

ham be-niyāz-e-fikr-e-ġham-e-āshiyāñ rahe

mujh sā chaman-parast chaman ko milā hai kab

is meñ agar rahe to mirī dāstāñ rahe

har barg-o-gul ko ḳhaar nazar aa rahe haiñ ḳhaar

matlab ye hai ki gul se dam-e-gulsitāñ rahe

ham tum raheñ jahān-e-tamanna-o-husn meñ

apne sivā na aur koī mehmāñ rahe

hai naam jis kā 'ishq ḳhushī se hai duur duur

ye to jahān-e-ġham hai masarrat kahāñ rahe

ye bhī ḳhayāl hai ki na ho shikva-e-alam

aur ye bhī chāhte ho ki muñh meñ zabāñ rahe

kab tak chhuTe na haath se dāmān-e-husn-o-'ishq

kab tak dil-e-hazīñ meñ ġham-e-do-jahāñ rahe

Thukrā ke jā rahe ho jise tum ba-sad-ḳhushī

tum hī batāo ab vo tamanna kahāñ rahe

ab justujū meñ bhī na ga.ī apnī be-ḳhudī

'bahzād' ham chale to pas-e-kārvāñ rahe

apni nai zamin naya aasman rahe

han is jahan se dur hi apna jahan rahe

hum ne to is chaman se lagaya kabhi na dil

hum be-niyaz-e-fikr-e-gham-e-ashiyan rahe

mujh sa chaman-parast chaman ko mila hai kab

is mein agar rahe to meri dastan rahe

har barg-o-gul ko KHar nazar aa rahe hain KHar

matlab ye hai ki gul se dam-e-gulsitan rahe

hum tum rahen jahan-e-tamanna-o-husn mein

apne siwa na aur koi mehman rahe

hai nam jis ka 'ishq KHushi se hai dur dur

ye to jahan-e-gham hai masarrat kahan rahe

ye bhi KHayal hai ki na ho shikwa-e-alam

aur ye bhi chahte ho ki munh mein zaban rahe

kab tak chhuTe na hath se daman-e-husn-o-'ishq

kab tak dil-e-hazin mein gham-e-do-jahan rahe

Thukra ke ja rahe ho jise tum ba-sad-KHushi

tum hi batao ab wo tamanna kahan rahe

ab justuju mein bhi na gai apni be-KHudi

'bahzad' hum chale to pas-e-karwan rahe