اپنی نظروں کے زاویے بدلیں

اپنی نظروں کے زاویے بدلیں

آئیے ہم بھی راستے بدلیں

ایک ہی طرز پر لکھیں کب تک

اپنی غزلوں کے قافیے بدلیں

وہ جو لکھتا ہے اس کو لکھنے دیں

چاہئے یوں کہ حاشیے بدلیں

میر تو روز ہی بدلتا ہے

کب یہ ہوگا کہ قافلے بدلیں

سب تو یکسانیت کے عادی ہیں

ہم بھی اب کس کے واسطے بدلیں

اپنا چہرہ نظر نہیں آتا

فکر یہ ہے کہ آئنے بدلیں

دیکھنے کو تو ہے بہت لیکن

دیکھنے کے بھی زاویے بدلیں

ہم وصیہؔ بدل کے دیکھ چکے

آپ اب اپنے قاعدے بدلیں