apni tanhai ko barbaad nahin karta main

apnī tanhā.ī ko barbād nahīñ kartā maiñ

kaun kahtā hai tujhe yaad nahīñ kartā maiñ

muskurāte hue chup-chāp bichhaḌ jaatā huuñ

rasm koī na.ī ījād nahīñ kartā maiñ

yaad tanhā.ī kasak sabr vafā sachchā.ī

in parindoñ ko to āzād nahīñ kartā maiñ

chāñd ko mujh se hamesha ye shikāyat hī rahī

hijr kā koī sabaq yaad nahīñ kartā maiñ

dil ko vīrān hī rahne meñ sukūñ miltā hai

is ko dānista bhī ābād nahīñ kartā maiñ

mere aañsū hī mire 'ishq kā sarmāya haiñ

jā shab-e-hijr ye imdād nahīñ kartā maiñ

mushta'il kar deñ musalmāñ ko musalmāñ ke ḳhilāf

us pe yakjā kabhī afrād nahīñ kartā maiñ

chhoḌ deñ saath jo manzil pe pahuñchne se qabl

aise logoñ ko to ham-zād nahīñ kartā maiñ

bhūkā rahnā mujhe manzūr hai lekin 'shahzād'

hākim-e-shahr se fariyād nahīñ kartā maiñ

apni tanhai ko barbaad nahin karta main

kaun kahta hai tujhe yaad nahin karta main

muskuraate hue chup-chap bichhaD jata hun

rasm koi nai ijad nahin karta main

yaad tanhai kasak sabr wafa sachchai

in parindon ko to aazad nahin karta main

chand ko mujh se hamesha ye shikayat hi rahi

hijr ka koi sabaq yaad nahin karta main

dil ko viran hi rahne mein sukun milta hai

is ko danista bhi aabaad nahin karta main

mere aansu hi mere 'ishq ka sarmaya hain

ja shab-e-hijr ye imdad nahin karta main

mushta'il kar den musalman ko musalman ke KHilaf

us pe yakja kabhi afrad nahin karta main

chhoD den sath jo manzil pe pahunchne se qabl

aise logon ko to ham-zad nahin karta main

bhuka rahna mujhe manzur hai lekin 'shahzad'

hakim-e-shahr se fariyaad nahin karta main