apni wahshat pe ro raha hun main

apnī vahshat pe ro rahā huuñ maiñ

kis parinde kā ghoñsla huuñ maiñ

terī bīnā.ī DhūñDhtī hai mujhe

terī āñkhoñ kā mas.ala huuñ maiñ

muḳhtalif giit mujh se marvī haiñ

muḳhtalif ḳhvāb dekhtā huuñ maiñ

tere lafzoñ meñ nuur bhartā huuñ

terī āvāz kā diyā huuñ maiñ

kal maiñ bedār ḳhvāb-gāh meñ thā

aaj chaukhaT pe jāgtā huuñ maiñ

terī manzil agar mohabbat hai

tere raste kā rāsta huuñ maiñ

jab ghuTan par na bas chale 'ārish'

apnī āñkhoñ se phūTtā huuñ maiñ

apni wahshat pe ro raha hun main

kis parinde ka ghonsla hun main

teri binai DhunDhti hai mujhe

teri aankhon ka masala hun main

muKHtalif git mujh se marwi hain

muKHtalif KHwab dekhta hun main

tere lafzon mein nur bharta hun

teri aawaz ka diya hun main

kal main bedar KHwab-gah mein tha

aaj chaukhaT pe jagta hun main

teri manzil agar mohabbat hai

tere raste ka rasta hun main

jab ghuTan par na bas chale 'arish'

apni aankhon se phuTta hun main