اپنوں کے درمیاں ہے مگر بے امان سا

اپنوں کے درمیاں ہے مگر بے امان سا

دل بھی ستم رسیدہ ہے ہندوستان سا

نامہرباں ہے وقت مگر ایک مہرباں

سایہ فگن ہے سر پہ مرے آسمان سا

اغیار تنگ دل ہیں تو اپنے منافقین

میرا بھی حال زار ہے اردو زبان سا

محتاط قربتوں کا مزہ ہی عجیب ہے

میں خوش گمان سا ہوں نہ تو بد گمان سا

آلام و سانحات و حوادث کے رو بہ رو

کب تک یہ مشت خاک بنے گا چٹان سا

سیل شکست خواب گزر تو گیا مگر

آنکھوں میں رہ گیا ہے لہو کا نشان سا

اپنا سفر ہواؤں کے رحم و کرم پہ ہے

ہستی سفینہ رنگ ہے تن بادبان سا

اس دور میں سکون و قرار و قیام امن

خالدؔ مجھے تو لگتا ہے وہم و گمان سا