asbab-e-bud-o-bash liye bhagte rahe

asbāb-e-būd-o-bāsh liye bhāgte rahe

ham ḳhvāhish-e-ma.āsh liye bhāgte rahe

apnoñ kā ġham-navāzī ne ye haal kar diyā

ham dard-e-dil-ḳharāsh liye bhāgte rahe

us ne baḌe kamāl se baazī to jiit lī

ham the ki sirf taash liye bhāgte rahe

pahuñcheñge ḳhaak manzil-e-jānāñ pe log vo

jo dil kā irti.āsh liye bhāgte rahe

vo jin ko apnī zinda-dilī par ġhurūr thā

ḳhauf-e-shikast-e-fāsh liye bhāgte rahe

ham haiñ shahīd-e-vaqt zarā dekhiye hameñ

kāñdhe pe apnī laash liye bhāgte rahe

'anvar' hamārī ruuh hameñ DhūñDhtī rahī

ham jism-e-pāsh-pāsh liye bhāgte rahe

asbab-e-bud-o-bash liye bhagte rahe

hum KHwahish-e-maash liye bhagte rahe

apnon ka gham-nawazi ne ye haal kar diya

hum dard-e-dil-KHarash liye bhagte rahe

us ne baDe kamal se bazi to jit li

hum the ki sirf tash liye bhagte rahe

pahunchenge KHak manzil-e-jaanan pe log wo

jo dil ka irtiash liye bhagte rahe

wo jin ko apni zinda-dili par ghurur tha

KHauf-e-shikast-e-fash liye bhagte rahe

hum hain shahid-e-waqt zara dekhiye hamein

kandhe pe apni lash liye bhagte rahe

'anwar' hamari ruh hamein DhunDhti rahi

hum jism-e-pash-pash liye bhagte rahe