اسباب بود و باش لیے بھاگتے رہے

اسباب بود و باش لیے بھاگتے رہے

ہم خواہش معاش لیے بھاگتے رہے

اپنوں کا غم نوازی نے یہ حال کر دیا

ہم درد دل خراش لیے بھاگتے رہے

اس نے بڑے کمال سے بازی تو جیت لی

ہم تھے کہ صرف تاش لیے بھاگتے رہے

پہنچیں گے خاک منزل جاناں پہ لوگ وہ

جو دل کا ارتعاش لیے بھاگتے رہے

وہ جن کو اپنی زندہ دلی پر غرور تھا

خوف شکست فاش لیے بھاگتے رہے

ہم ہیں شہید وقت ذرا دیکھیے ہمیں

کاندھے پہ اپنی لاش لیے بھاگتے رہے

انورؔ ہماری روح ہمیں ڈھونڈھتی رہی

ہم جسم پاش پاش لیے بھاگتے رہے