ashk aankhon mein Dar se la na sake

ashk āñkhoñ meñ Dar se lā na sake

dil kī bhaḌkī huī bujhā na sake

na hilī jab zabāñ nazākat se

rah ga.e dekh kar bulā na sake

thiiñ jo us meñ hayā kī kuchh bāteñ

shikva merā vo lab pe lā na sake

kyā hue tere hausle ai ashk

harf-e-taqdīr ko miTā na sake

thā ye ḳhatra kahīñ pasand na hoñ

gāliyāñ bhī mujhe sunā na sake

go bahut pās-e-ġhair thā lekin

aañkh ham se bhī vo churā na sake

paañv chūmā kiye hinā kī tarah

jab koī aur rañg lā na sake

ḳhāmushī thī ba-shakl-e-zaḳhm mujhe

lab tak apne savāl aa na sake

na malī us ne paañv meñ mehñdī

rañg apnā adū jamā na sake

iztirāb-e-qazā huā ye 'nasīm'

ki gale bhī use lagā na sake

ashk aankhon mein Dar se la na sake

dil ki bhaDki hui bujha na sake

na hili jab zaban nazakat se

rah gae dekh kar bula na sake

thin jo us mein haya ki kuchh baaten

shikwa mera wo lab pe la na sake

kya hue tere hausle ai ashk

harf-e-taqdir ko miTa na sake

tha ye KHatra kahin pasand na hon

galiyan bhi mujhe suna na sake

go bahut pas-e-ghair tha lekin

aankh hum se bhi wo chura na sake

panw chuma kiye hina ki tarah

jab koi aur rang la na sake

KHamushi thi ba-shakl-e-zaKHm mujhe

lab tak apne sawal aa na sake

na mali us ne panw mein mehndi

rang apna adu jama na sake

iztirab-e-qaza hua ye 'nasim'

ki gale bhi use laga na sake