ashk ko dariya banaya aankh ko sahil kiya

ashk ko dariyā banāyā aañkh ko sāhil kiyā

maiñ ne mushkil vaqt ko kuchh aur bhī mushkil kiyā

ek māyūsī hī dil meñ kab talak rahtī mire

maiñ ne māyūsī meñ dil kā ḳhauf bhī shāmil kiyā

niiñd kī imdād jaise hī baham pahuñchī mujhe

aañkh ke maqtal meñ apne ḳhvāb ko dāḳhil kiyā

varna terā chhoḌ jaanā jaan le jaatā mirī

karb meñ aañsū milā kar dard ko zaa.il kiyā

jaise duniyā dekhtī hai vaise kab tak dekhte

dīda-e-bīnā se dekheñ ḳhud ko is qābil kiyā

ek chehra aur do āñkheñ le ga.e bāzār meñ

girvī rakh ke un ko phir ik aa.ina hāsil kiyā

varna vo kab baat suntā thā kisī kī bazm meñ

maiñ ne apne sher se us shaḳhs ko qaa.il kiyā

be-niyāzī se guzāre umr ke battīs saal

kho diyā kab jaane tujh ko kab tujhe hāsil kiyā

rāt-din ulTā laTak kar zaat ke kuueñ meñ 'zeb'

soch kī nā-puḳhtagī ko mashq se kāmil kiyā

ashk ko dariya banaya aankh ko sahil kiya

main ne mushkil waqt ko kuchh aur bhi mushkil kiya

ek mayusi hi dil mein kab talak rahti mere

main ne mayusi mein dil ka KHauf bhi shamil kiya

nind ki imdad jaise hi baham pahunchi mujhe

aankh ke maqtal mein apne KHwab ko daKHil kiya

warna tera chhoD jaana jaan le jata meri

karb mein aansu mila kar dard ko zail kiya

jaise duniya dekhti hai waise kab tak dekhte

dida-e-bina se dekhen KHud ko is qabil kiya

ek chehra aur do aankhen le gae bazar mein

girwi rakh ke un ko phir ek aaina hasil kiya

warna wo kab baat sunta tha kisi ki bazm mein

main ne apne sher se us shaKHs ko qail kiya

be-niyazi se guzare umr ke battis sal

kho diya kab jaane tujh ko kab tujhe hasil kiya

raat-din ulTa laTak kar zat ke kuen mein 'zeb'

soch ki na-puKHtagi ko mashq se kaamil kiya