ashkon mein aaj phir se nahae hue hain hum

ashkoñ meñ aaj phir se nahā.e hue haiñ ham

kūche se us sanam ke bhagā.e hue haiñ ham

hākim vatan ke vāste qurbāniyāñ na pūchh

jaañ ik taraf jahān luTā.e hue haiñ ham

mujh ko jo dekhā us ne kahā yūsufī suno

uñglī to kyā jigar hī kaTā.e hue haiñ ham

ham ḳhvāb tere dekheñ ye mumkin nahīñ kabhī

tujh se bichhaḌ ke niiñd gañvā.e hue haiñ ham

ham sab aTuuT añg haiñ ik murda jism ke

ahl-e-vatan ke hāthoñ satā.e hue haiñ ham

ai maut ruk jā aañkh hamārī na band kar

āñkhoñ meñ ḳhvāb-e-vasl sajā.e hue haiñ ham

kal tak samajh rahe the hameñ ham-nafas magar

ye kyā sitam hai aaj parā.e hue haiñ ham

'kāshif' zamīn-e-husn pe barsāt ke liye

āvārgī ko abr banā.e hue haiñ ham

ashkon mein aaj phir se nahae hue hain hum

kuche se us sanam ke bhagae hue hain hum

hakim watan ke waste qurbaniyan na puchh

jaan ek taraf jahan luTae hue hain hum

mujh ko jo dekha us ne kaha yusufi suno

ungli to kya jigar hi kaTae hue hain hum

hum KHwab tere dekhen ye mumkin nahin kabhi

tujh se bichhaD ke nind ganwae hue hain hum

hum sab aTuT ang hain ek murda jism ke

ahl-e-watan ke hathon satae hue hain hum

ai maut ruk ja aankh hamari na band kar

aankhon mein KHwab-e-wasl sajae hue hain hum

kal tak samajh rahe the hamein ham-nafas magar

ye kya sitam hai aaj parae hue hain hum

'kashif' zamin-e-husn pe barsat ke liye

aawargi ko abr banae hue hain hum