asir-e-zat hain so dil ki hukmarani mein

asīr-e-zāt haiñ so dil kī hukmarānī meñ

guzārte haiñ kisī tarh she'r-ḳhvānī meñ

kisī ko bhī mire baare meñ kuchh nahīñ mā'lūm

so is kahānī meñ huuñ maiñ na us kahānī meñ

ye kis ne arz-o-samā kā miTā diyā hai farq

zamīnī rang milāyā hai āsmānī meñ

maiñ nafsiyātī koī baat kar bhī luuñ lekin

ḳhalal paḌe na kahīñ terī shādmānī meñ

kisī ke paanī meñ kuchh bhī nahīñ thā kuchh bhī nahīñ

kisī kī chhab jo nahīñ thī kisī ke paanī meñ

chalo ki donoñ ko āḳhir ḳhushī milī 'tarkash'

tū chheḌ-ḳhāni meñ ḳhush hai maiñ nauha-ḳhvānī meñ

asir-e-zat hain so dil ki hukmarani mein

guzarte hain kisi tarh she'r-KHwani mein

kisi ko bhi mere bare mein kuchh nahin ma'lum

so is kahani mein hun main na us kahani mein

ye kis ne arz-o-sama ka miTa diya hai farq

zamini rang milaya hai aasmani mein

main nafsiyati koi baat kar bhi lun lekin

KHalal paDe na kahin teri shadmani mein

kisi ke pani mein kuchh bhi nahin tha kuchh bhi nahin

kisi ki chhab jo nahin thi kisi ke pani mein

chalo ki donon ko aaKHir KHushi mili 'tarkash'

tu chheD-KHani mein KHush hai main nauha-KHwani mein