aur to kuchh nahin mere dil ki hai ek aarzu guftugu

aur to kuchh nahīñ mere dil kī hai ik aarzū guftugū

chāhtā hai kisī roz ho aap se rū-barū guftugū

baat kis kī sunūñ ġhaur se maiñ yahāñ kis se bāteñ karūñ

har taraf se sadā.eñ lapaktī huiiñ chār-sū guftugū

jang kī muḳhtalif sāzishoñ meñ pas-e-pusht masrūf hai

sāmne baiTh kar amn kī kar rahā hai 'adū guftugū

vo kabhī is tarah baat kartā hai goyā shanāsā nahīñ

aur yuuñ bhī kabhī jaise karte haiñ do ham-subū guftugū

kaash aisā ho merī taraf aur koī tavajjoh na de

is bharī bazm meñ mujh se kartā rahe ek tū guftugū

merā terā ta'alluq hai kyā ye kisī ko nahīñ hai ḳhabar

mere tere ta'alluq pe phir bhī huī kū-ba-kū guftugū

us ne 'āsim' har ik faisla kar liyā mujh se pūchhe binā

aur har faisle pe ye maiñ ne kahā guftugū guftugū

aur to kuchh nahin mere dil ki hai ek aarzu guftugu

chahta hai kisi roz ho aap se ru-baru guftugu

baat kis ki sunun ghaur se main yahan kis se baaten karun

har taraf se sadaen lapakti huin chaar-su guftugu

jang ki muKHtalif sazishon mein pas-e-pusht masruf hai

samne baiTh kar amn ki kar raha hai 'adu guftugu

wo kabhi is tarah baat karta hai goya shanasa nahin

aur yun bhi kabhi jaise karte hain do ham-subu guftugu

kash aisa ho meri taraf aur koi tawajjoh na de

is bhari bazm mein mujh se karta rahe ek tu guftugu

mera tera ta'alluq hai kya ye kisi ko nahin hai KHabar

mere tere ta'alluq pe phir bhi hui ku-ba-ku guftugu

us ne 'asim' har ek faisla kar liya mujh se puchhe bina

aur har faisle pe ye main ne kaha guftugu guftugu