اور زیادہ سنجیدہ ہو کر لوٹے

اور زیادہ سنجیدہ ہو کر لوٹے

میلے سے ہم رنجیدہ ہو کر لوٹے

تیرے شیدائی تیرے الطاف کے بعد

اپنے اوپر گرویدہ ہو کر لوٹے

اتنی طغیانی تھی نیند کے ساحل پر

سارے سپنے نم دیدہ ہو کر لوٹے

پہلے ہم نے دوڑ لگائی سورج تک

پھر دھرتی پر نادیدہ ہو کر لوٹے

تو دعویٰ کرتا تھا سہل بنانے کا

لیکن ہم تو پیچیدہ ہو کر لوٹے

کچھ لمحہ جو صرف خیالوں میں گزرے

وہ خوابوں میں پوشیدہ ہو کر لوٹے

کوئی ان سے مل کر شاید رویا تھا

اب کے موسم بوسیدہ ہو کر لوٹے