اوروں میں خود کو جان بہ لب ڈھونڈتے رہے

اوروں میں خود کو جان بہ لب ڈھونڈتے رہے

غیروں میں اپنا نام و نسب ڈھونڈتے رہے

سورج تو روشنی کے صحیفوں میں قید تھا

ہم سب اسے پس رخ شب ڈھونڈتے رہے

جو تھا ہمارے ساتھ ہر اک رنگ میں اسے

پتھر کی اک حویلی میں سب ڈھونڈتے رہے

دھوکا تھا وہ نظر کا مگر اس کا کیا کہیں

دنیا کی بھیڑ میں اسے جب ڈھونڈتے رہے

وہ تھا ترے مرے رگ جاں کے حصار میں

دیر و حرم میں ہی اسے جب ڈھونڈتے رہے

ملتا نہیں سکوں تری بزم حیات میں

جیتے جی ہم تو موت کے ڈھب ڈھونڈتے رہے