azab-e-hijr bhi hai rahat-e-visal ke sath

azāb-e-hijr bhī hai rāhat-e-visāl ke saath

milī to haiñ mujhe ḳhushiyāñ magar malāl ke saath

tumhārī yaad meñ bhī zabt-o-etidāl kahāñ

maiñ tum se kaise milūñ zabt-o-etidāl ke saath

yahī bahut hai zamāne meñ chār-din ke liye

agar hayāt kaTe ek ham-ḳhayāl ke saath

kuchh is tarah shab-e-mah ne kiran kī dastak dī

ubhar ga.iiñ ka.ī choTeñ kisī ḳhayāl ke saath

ufuq nahīñ to kisī chāñd kā tasavvur kyā

sitāre Duub ga.e dard ke zavāl ke saath

shafaq gulāl kalī chāñdnī alaap sahar

nazar ke sāmne aa.e tirī misāl ke saath

bhaTak rahā huuñ ki fardā kā rāsta gum hai

qadam qadam mirā maazī hai mere haal ke saath

use sunūñ ki use dekhtā rahūñ ai 'shāz'

jamāl-e-naġhma bhī hai naġhma-e-jamāl ke saath

azab-e-hijr bhi hai rahat-e-visal ke sath

mili to hain mujhe KHushiyan magar malal ke sath

tumhaari yaad mein bhi zabt-o-etidal kahan

main tum se kaise milun zabt-o-etidal ke sath

yahi bahut hai zamane mein chaar-din ke liye

agar hayat kaTe ek ham-KHayal ke sath

kuchh is tarah shab-e-mah ne kiran ki dastak di

ubhar gain kai choTen kisi KHayal ke sath

ufuq nahin to kisi chand ka tasawwur kya

sitare Dub gae dard ke zawal ke sath

shafaq gulal kali chandni alap sahar

nazar ke samne aae teri misal ke sath

bhaTak raha hun ki farda ka rasta gum hai

qadam qadam mera mazi hai mere haal ke sath

use sunun ki use dekhta rahun ai 'shaz'

jamal-e-naghma bhi hai naghma-e-jamal ke sath