azab sa hai dil-e-na-murad par kab se

azaab sā hai dil-e-nā-murād par kab se

khaḌā huuñ maiñ ravish-e-gard-bād par kab se

kabhī miloge kahīñ to miloge jiite jī

maiñ jī rahā huuñ isī e'timād par kab se

jo baaḌh aa.ī to be-chāra bah gayā ḳhud hī

jo band bāñdh rahā thā fasād par kab se

vo zindagī jo kabhī muḌ ke dekhtī bhī nahīñ

maiñ mar rahā huuñ usī bad-nihād par kab se

mire qalam pe bhī shab-ḳhūn paḌ gayā āḳhir

muhāsara thā mirī jā.edād par kab se

maiñ raushnī ko bhulā duuñ to kyā ta.ajjub hai

baras rahā hai dhuāñ merī yaad par kab se

mire vajūd meñ kyā shāhkār hai pinhāñ

chaḌhā rahā hai zamāna ḳharād par kab se

tamām shahr-e-samā.at laraz uThā 'qaisar'

nikal paḌī hai ḳhamoshī jihād par kab se

azab sa hai dil-e-na-murad par kab se

khaDa hun main rawish-e-gard-baad par kab se

kabhi miloge kahin to miloge jite ji

main ji raha hun isi e'timad par kab se

jo baDh aai to be-chaara bah gaya KHud hi

jo band bandh raha tha fasad par kab se

wo zindagi jo kabhi muD ke dekhti bhi nahin

main mar raha hun usi bad-nihad par kab se

mere qalam pe bhi shab-KHun paD gaya aaKHir

muhasara tha meri jaedad par kab se

main raushni ko bhula dun to kya tajjub hai

baras raha hai dhuan meri yaad par kab se

mere wajud mein kya shahkar hai pinhan

chaDha raha hai zamana KHarad par kab se

tamam shahr-e-samaat laraz uTha 'qaisar'

nikal paDi hai KHamoshi jihad par kab se