ba-har-surat Thahar jaana paDega

ba-har-sūrat Thahar jaanā paḌegā

agar raste meñ mai-ḳhāna paḌegā

mohabbat meñ sukūn-e-dil kī ḳhātir

kisī din zahr bhī khānā paḌegā

abhī manzil kahāñ ai zauq-e-manzil

abhī to manziloñ jaanā paḌegā

na pūchho mujh se vaj.h-e-be-qarārī

bharī mahfil meñ sharmānā paḌegā

kahāñ jā.ūñ maiñ tere dar se uTh kar

palaT kar phir yahīñ aanā paḌegā

yahī pur-lutf ulfat ho to puḳhta

sarāpā dard ban jaanā paḌegā

haiñ kyā dair-o-haram un kī talab meñ

ḳhudā jaane kahāñ jaanā paḌegā

tamannā-e-vafādārī salāmat

unheñ bhī haath phailānā paḌegā

javānī ābrū-e-zindagī hai

ye daulat kho ke pachhtānā paḌegā

samajh lo 'jurm' dastūr-e-mohabbat

zamāne bhar ko samjhānā paḌegā

ba-har-surat Thahar jaana paDega

agar raste mein mai-KHana paDega

mohabbat mein sukun-e-dil ki KHatir

kisi din zahr bhi khana paDega

abhi manzil kahan ai zauq-e-manzil

abhi to manzilon jaana paDega

na puchho mujh se wajh-e-be-qarari

bhari mahfil mein sharmana paDega

kahan jaun main tere dar se uTh kar

palaT kar phir yahin aana paDega

yahi pur-lutf ulfat ho to puKHta

sarapa dard ban jaana paDega

hain kya dair-o-haram un ki talab mein

KHuda jaane kahan jaana paDega

tamanna-e-wafadari salamat

unhen bhi hath phailana paDega

jawani aabru-e-zindagi hai

ye daulat kho ke pachhtana paDega

samajh lo 'jurm' dastur-e-mohabbat

zamane bhar ko samjhana paDega