baad hijrat ke mere pas raha kuchh bhi nahin

baa'd hijrat ke mire paas rahā kuchh bhī nahīñ

tum samajhte ho mire saath huā kuchh bhī nahīñ

hijr meñ chhin ga.iiñ ḳhushiyāñ sabhī āñkhoñ meñ mirī

kyā qayāmat hai ki ashkoñ ke sivā kuchh bhī nahīñ

kuchh bhī maqsūd nahīñ mujh ko tumhāre badle

ḳhvāhish-e-jah nahīñ dastār-o-qabā kuchh bhī nahīñ

sarvarī mil ga.ī ulfat meñ tumhārī mujh ko

maiñ bhalā kaise kahūñ tum se milā kuchh bhī nahīñ

jab muqaddar dar-e-jānāñ kī jabīñ-sā.ī hai

to phir is jazba-e-ulfat kī jazā kuchh bhī nahīñ

yahī 'fāḳhir' kā asāsa hai to hai mujh ko 'azīz

is se behtar nahīñ shai besh-bahā kuchh bhī nahīñ

ba'd hijrat ke mere pas raha kuchh bhi nahin

tum samajhte ho mere sath hua kuchh bhi nahin

hijr mein chhin gain KHushiyan sabhi aankhon mein meri

kya qayamat hai ki ashkon ke siwa kuchh bhi nahin

kuchh bhi maqsud nahin mujh ko tumhaare badle

KHwahish-e-jah nahin dastar-o-qaba kuchh bhi nahin

sarwari mil gai ulfat mein tumhaari mujh ko

main bhala kaise kahun tum se mila kuchh bhi nahin

jab muqaddar dar-e-jaanan ki jabin-sai hai

to phir is jazba-e-ulfat ki jaza kuchh bhi nahin

yahi 'faKHir' ka asasa hai to hai mujh ko 'aziz

is se behtar nahin shai besh-baha kuchh bhi nahin