baad-e-bahaaran le aai hai bhule hue afsanon ko

bād-e-bahārāñ le aa.ī hai bhūle hue afsānoñ ko

jaane kyā samjhā thā zamāne ne apne dīvānoñ ko

kaise kaise log the jin se bastī bastī gulshan thī

gulshan gulshan vīrāne haiñ dekh liyā insānoñ ko

bijliyoñ ko bhī taab na thī jin kī vo nasheman ḳhud phūñke

par māreñ na parinde jahāñ luuTā aise kāshānoñ ko

shaiḳh-o-barahman dast-o-garebāñ dair-o-haram paivand-e-zamīn

āḳhir ajnabī hāthoñ ne uljhā hī diyā nā-dānoñ ko

shāyad ab tā'mīr kī lazzat pā na sakeñge jiite jī

jaise chāheñ bahlā.eñ barbādī ke armānoñ ko

chhoḌo bhī tadbīr ke qisse koī ḳhirad kī baat karo

vahshī hī ābād kareñge duniyā ke vīrānoñ ko

sadiyoñ purāne rang meñ tū ne apne vaqt kā haal kahā

kab tak ye andāz 'nazar' ḳhush aa.egā farzānoñ ko

baad-e-bahaaran le aai hai bhule hue afsanon ko

jaane kya samjha tha zamane ne apne diwanon ko

kaise kaise log the jin se basti basti gulshan thi

gulshan gulshan virane hain dekh liya insanon ko

bijliyon ko bhi tab na thi jin ki wo nasheman KHud phunke

par maren na parinde jahan luTa aise kashanon ko

shaiKH-o-barahman dast-o-gareban dair-o-haram paiwand-e-zamin

aaKHir ajnabi hathon ne uljha hi diya na-danon ko

shayad ab ta'mir ki lazzat pa na sakenge jite ji

jaise chahen bahlaen barbaadi ke armanon ko

chhoDo bhi tadbir ke qisse koi KHirad ki baat karo

wahshi hi aabaad karenge duniya ke viranon ko

sadiyon purane rang mein tu ne apne waqt ka haal kaha

kab tak ye andaz 'nazar' KHush aaega farzanon ko