bagh-e-jannat pe na aflak pe rakkha hua hai

bāġh-e-jannat pe na aflāk pe rakkhā huā hai

dhyān us ke badan-e-pāk pe rakkhā huā hai

baḌh ke ḳhushbū se hai jab lutf meñ vo nūr-e-qadīm

bojh sā kyoñ mire idrāk pe rakkhā huā hai

sirf kahne ko mukammal hai ye 'ālam varna

aaj bhī saarā jahāñ chaak pe rakkhā huā hai

'ishq mabnī-ba-havas kī miyāñ auqāt hī kyā

ek sho'la hai jo ḳhāshāk pe rakkhā huā hai

jo pujārī haiñ badan ke tire un logoñ kā

zor saarā tirī poshāk pe rakkhā huā hai

ham haiñ jis ḳhaak se jis ḳhaak meñ milnā hai hameñ

takiya ham ne bas usī ḳhaak pe rakkhā huā hai

ye jahāñ yuuñ hī munavvar to nahīñ hai 'najmī'

ik diyā gumbad-e-aflāk pe rakkhā huā hai

bagh-e-jannat pe na aflak pe rakkha hua hai

dhyan us ke badan-e-pak pe rakkha hua hai

baDh ke KHushbu se hai jab lutf mein wo nur-e-qadim

bojh sa kyon mere idrak pe rakkha hua hai

sirf kahne ko mukammal hai ye 'alam warna

aaj bhi sara jahan chaak pe rakkha hua hai

'ishq mabni-ba-hawas ki miyan auqat hi kya

ek sho'la hai jo KHashak pe rakkha hua hai

jo pujari hain badan ke tere un logon ka

zor sara teri poshak pe rakkha hua hai

hum hain jis KHak se jis KHak mein milna hai hamein

takiya hum ne bas usi KHak pe rakkha hua hai

ye jahan yun hi munawwar to nahin hai 'najmi'

ek diya gumbad-e-aflak pe rakkha hua hai