bahar to kar raha hun main aaraishen bahut

bāhar to kar rahā huuñ maiñ ārā.isheñ bahut

andar haiñ par makān ke ālā.isheñ bahut

tū hai ki tere saath haiñ āsā.isheñ bahut

maiñ huuñ ki mere saath marīñ ḳhvāhisheñ bahut

naqsh-o-nigār kyā yahāñ dīvār-o-dar nahīñ

shāyad ki is makāñ pe raheñ bārisheñ bahut

ham the ki apnī zaat ke jangal meñ gum rahe

thiiñ arsa-e-hayāt meñ gunjā.isheñ bahut

apnā vajūd raah kā patthar samajh ke maiñ

apne ḳhilāf kartā rahā sāzisheñ bahut

kuchh ghar chamak uThe to ka.ī ghar jhulas ga.e

rusvā haiñ āftāb tirī tābisheñ bahut

har lamha ik nashāt hai zāhir kā mel-jol

gahre hoñ rasm-o-rāh to phir ranjisheñ bahut

apnā bhī le tū gaañv kī saada sī zindagī

'shāhid' abas haiñ shahr meñ zebā.isheñ bahut

bahar to kar raha hun main aaraishen bahut

andar hain par makan ke aalaishen bahut

tu hai ki tere sath hain aasaishen bahut

main hun ki mere sath marin KHwahishen bahut

naqsh-o-nigar kya yahan diwar-o-dar nahin

shayad ki is makan pe rahen barishen bahut

hum the ki apni zat ke jangal mein gum rahe

thin arsa-e-hayat mein gunjaishen bahut

apna wajud rah ka patthar samajh ke main

apne KHilaf karta raha sazishen bahut

kuchh ghar chamak uThe to kai ghar jhulas gae

ruswa hain aaftab teri tabishen bahut

har lamha ek nashat hai zahir ka mel-jol

gahre hon rasm-o-rah to phir ranjishen bahut

apna bhi le tu ganw ki sada si zindagi

'shahid' abas hain shahr mein zebaishen bahut