baala-e-baam ghair hai mein aastan par

bālā-e-bām ġhair hai meñ āstān par

chāheñ jise chaḌhā.eñ huzūr āsmān par

kyuuñ nā-murād aah ga.ī āsmān par

TuuTe na āsmān kahīñ merī jaan par

rusvā.iyāñ haiñ saath vo chhup kar hazār jaan

sau sau ke sar jhuke haiñ qadam ke nishān par

aanā use zarūr go hoñ laakh ehtimām

āshiq hai un kī niiñd mirī dāstān par

thā rāz-dār-e-husn vo kāfir jo kah gayā

ma.ashūq dil kī baat na laa.eñ zabān par

un kī galī meñ raat meñ is vaz.a se gayā

ghabrā ke pāsbān gire pāsbān par

nāzuk sī teġh-e-yār hai kyā zahr kī bujhī

khaa.e hue hai zahr mire imtihān par

bante haiñ shoḳhiyoñ se vo sūraj bhī chāñd bhī

naqsh-e-qadam bhī aap ke haiñ āsmān par

ḳhalvat meñ bhī chalī haiñ kahīñ sīna-zoriyāñ

is tarah aap tan ke uThe kis gumān par

zikr-e-mai-e-tahūr ne taḌpā diyā 'riyāz'

jaanā paḌā hameñ kisī ūñchī dukān par

baala-e-baam ghair hai mein aastan par

chahen jise chaDhaen huzur aasman par

kyun na-murad aah gai aasman par

TuTe na aasman kahin meri jaan par

ruswaiyan hain sath wo chhup kar hazar jaan

sau sau ke sar jhuke hain qadam ke nishan par

aana use zarur go hon lakh ehtimam

aashiq hai un ki nind meri dastan par

tha raaz-dar-e-husn wo kafir jo kah gaya

mashuq dil ki baat na laen zaban par

un ki gali mein raat mein is waza se gaya

ghabra ke pasban gire pasban par

nazuk si tegh-e-yar hai kya zahr ki bujhi

khae hue hai zahr mere imtihan par

bante hain shoKHiyon se wo suraj bhi chand bhi

naqsh-e-qadam bhi aap ke hain aasman par

KHalwat mein bhi chali hain kahin sina-zoriyan

is tarah aap tan ke uThe kis guman par

zikr-e-mai-e-tahur ne taDpa diya 'riyaz'

jaana paDa hamein kisi unchi dukan par