bar-e-gham se dam labon par aa gaya

bār-e-ġham se dam laboñ par aa gayā

aise jiine se to jī ghabrā gayā

ḳhuld kī tārīf āḳhir tā-ba-ke

sunte sunte jī mirā uktā gayā

haa.e kab laa.ī sabā paiġhām-e-zīst

ġhuncha-e-ummīd jab murjhā gayā

kaun hotā hai kisī kā ḳhizr-e-rāh

apnī manzil tak har ik tanhā gayā

ye bhī kyā kam hai shab-e-ġham kā karam

mujh ko jiine kā salīqa aa gayā

kyoñ araq-ālūda peshānī huī

yaad shāyad aap ko kuchh aa gayā

ab to qaul-e-‘dard’ hai vird-e-zabāñ

bas hujūm-e-yās jī ghabrā gayā

ajnabī huuñ aaj maiñ us bazm meñ

bār-hā 'tālib' jahāñ aayā gayā

bar-e-gham se dam labon par aa gaya

aise jine se to ji ghabra gaya

KHuld ki tarif aaKHir ta-ba-ke

sunte sunte ji mera ukta gaya

hae kab lai saba paigham-e-zist

ghuncha-e-ummid jab murjha gaya

kaun hota hai kisi ka KHizr-e-rah

apni manzil tak har ek tanha gaya

ye bhi kya kam hai shab-e-gham ka karam

mujh ko jine ka saliqa aa gaya

kyon araq-aluda peshani hui

yaad shayad aap ko kuchh aa gaya

ab to qaul-e-‘dard’ hai wird-e-zaban

bas hujum-e-yas ji ghabra gaya

ajnabi hun aaj main us bazm mein

bar-ha 'talib' jahan aaya gaya